Nadal-Nadal-va tras la val!

Tgi ei quei affon,aschi niebel e car,
ch'ei cheu en pursepen d'anflar?
In tal--aschi dultsch ed amabel bambin
sto esser pilver--in affon tut divin!

Igl ei il Messias,vegn Jesus numnaus,
Il fegl da Diu sez,ch'ei carstgaun daventaus;
El num dils carstgauns ha el vuliu satisfar,
Perquei aschi bauld penetienzia vul far.

La dunna leu en schanuglias urond
mirond tut beada sil niebel affon,
Quell'ei sia mumma d'in cor benediu,
ed ella ei veramein mumma da Diu.

Igl um,che stat speras aschi devozius,
alzond viers il tschiel ses egls tut surprius,
siu spus,sogn Giusep sto quei esser pilver,
ed el ha dagl affon siu grondius plascher.

Leu en in cantun--empau pli davostier,
in bov ed in asen selaian veser,
quels animals gidan la stalla scaldar
entras siu modest e migeivel fladar.

Quals ein quels--cun ladas capialas sin tgau,
tenend enta maun in liung fest enferrau?
Els ein ils buns pasturs,aunc,da notg cheu vegni,
e mintgin port'in tschut entuorn siu schui.

E quels che fan esser en stalla schi clar,
che sunan e contan,ch'ins sto tut surstar,
els ein ils cars aunghels,ch'ein plein legherment,
els miran dad esch e finiastras viaden.

Da lunsch er'ins vesa treis umens vegnend,
Mirond sin la steila cun cor tut cartent.
Quei ei ils sogns retgs,ed els han ils mauns pleins,
dad aur e da mirr e custeivel entscheins.

Ins vesa ad ault la steila a star,
gest sur la stalla,e fa lunsch entuorn clar.
Il Segner ils sabis tras quell'ha menau,
ein spert arrivai ed han gl'affon adurau.

O seigies ludaus,benedius,aduraus,
carin affon Jesus,da tuts carezaus!
Ti car Bambin,schi pigns e tremblonts,
co eis ti sur tut infinitamein gronds!