In avonmiezdi da plievgia a Glion ni: experienzas da rimnar suttascripziuns

Da Tresa Deplazes, commembra dalla gruppa da geniturs “sursilvan en scola a Glion” e dalla suprastonza da Pro Idioms

Mes sentiments che pertuccan la situaziun dil romontsch van tras bogns alternonts. Mintgaton haiel il sentiment che tut vegni bien e lu tratgel puspei che nus haveien gia piars las hottas orda maun. Savens ei bia diffus ed igl ei grev da restar optimis-ta. E tuttina sundel ei. Per exempel, inaga dapli la sonda avon otg dis.
Gia daditg vein nus lantschau la petiziun per re-introducir il sursilvan en scola a Glion e Schnaus, e nus ei manegiau ina gruppa da mummas e dus babs. Tuts nus vein la medema e ferma finamira che nos affons dueigien saver turnar agl idiom sco lungatg d’alfabetisaziun, e quei independentamein dil fatg con ditg ch’ei han gia giu rg en scola. Mintgin e mintgina da nus rimna suttascripziuns tut tenor la peda.
La sonda vargada ei stau la secunda ga che nus vein fatg giu, quella ga en treis, dad ir avon las stizuns per plidentar la glieud. Per mei ei quei mintga ga empau sc’in eveniment da recreaziun : saver ch’ils affons ein bein pertgirai a casa, la cumpra jamnila ei fatga gia ier e nus dunnas culs medems interess essan denter nus. Ditg eisi buc da spitgar, in di da plievgia ei attractivs per ir en stizun e la glieud ha peda. E sco gia tschella ga stuein nus mo dir cuortamein per tgei ch‘ei va e gia ei la decisiun per suttascriver curdada : ei va sco da beiber aua ! Pil pli dat ei aunc in cuort discuors ed ins sa sedrizzar alla proxima persuna.
Ella drovi in caffè ed ina cigaretta, di mia collega, mo nus vein gie pér grad entschiet! Bien vinavon, ed il temps sgola! Mo oha, avon che nus meriteien nies caffè dat ei tuttina aunc per mintgina da nus ina trumpada. Duas persunas refusan la suttascripziun e renfatschan a nus da far il disuorden che regi il mument. Nus schein cumbien , midein liug e mein a beiber in.
Levan atgnamein paterlar in tec dad autras caussas e guder nies caffè, e mia collega sia cigaretta… Selegrau memia baul: in collega d’in’autra visch-nauca s’avischina, selegra da veser nus e nus sediscurrin, da tgei: rg en scola! Suenter ver pagau entupein nus nossa collega e rimnein vinavon en treis. E puspei va ei sco da beiber aua. Ei dat era enqual discussiun cun adherents dil rg e quellas drovan empau energia da nus. Ils pli biars denton sustegnan nus. Pliras ga vein nus era survegniu cumpliments per nossa curascha e gronds engraziaments che nus fageien quella lavur.
La glieud che suttascriva ei il bia geniturs pertuccai, denton era quels che han ils affons ord scola, ch’ein pia mitschai, e da tuts quels eisi biars era da vischnauncas vischinontas, ch’ein fetg interessai che era Glion (culla scola superiura) midi tiel sursilvan. Da miezdi essan turnadas a casa cun buns sentiments, sentiments che muossan che nus seigien silla dretga via e che zatgi stoppi era far quella lavur ! Nossa raccolta en ver 3 uras : 57 suttascripziuns !
Ina suletta caussa, denton buc nunimpurtonta, che reussescha pil pli buc, ei che curiosamein cura ch’ins fa attents ch’ins sappi era aunc vegnir commember dalla Pro Idioms, dian quasi tuts na. Ils biars manegian ch’ei hagien uss fatg il lur e vulan buc pli tedlar pli ditg sch’ei va en detagls. E sch’ins gudogna tuttina enzatgi lu sefan ins en ch’ei eran gnanc informai tgei uniun che Pro Idioms ei.
Jeu sun perschuadida ch’il discuors sco tal cun la glieud, era sin via, ei zatgei impurtont. Biars san che lur cor batta pigl idiom. Mo pér cun formular pertgei che quei ei aschia vegn ei cunscient con prezius che nies lungatg-mumma ei. Nus tuts essan uss ella situaziun che nus realisein ch’astgar scriver igl idiom secapescha buc pli dil tut da sez !
PRO IDIOMS
www.proidioms.ch