"Tgei fortuna ei la mia"..........

Uschia tunan las melodias en las veglias collecziuns da chanzuns popularas.

Ils 23 da november 2011 a las 18.00 uras vegn averta en la Biblioteca chantunala dal Grischun in'exposiziun davart la collecziun da chanzuns popularas rumantschas dad Alfons Maissen. La
vernissascha da questa exposiziun preschenta era la staziun auditiva da la Fonoteca Naziunala Svizra.

Il romanist e scienzà da la cultura populara Alfons Maissen (1905–2003) è stà in grond conuschider e rimnader instancabel da la cultura materiala. Ses relasch è dad in'impurtanza eminenta per l'istorgia culturala rumantscha e grischuna, surtut era perquai ch'el cumpiglia tranter auter ca. 1500 documents da notas da chanzuns popularas rumantschas e da chanzuns religiusas rumantschas ch'èn uss accessiblas per in public pli grond.

L'exposiziun communabla da la Biblioteca chantunala dal Grischun, da l'Institut grischun per la perscrutaziun da la cultura e da l'Institut dal Dicziunari Rumantsch Grischun mussa la collecziun da chanzuns popularas dad Alfons Maissen. A chaschun da l'avertura dattan Iso Albin, Cristian Collenberg, Silvana Derungs e Marius Risi in'introducziun en la collecziun: en curts referats preschentan els l'istorgia da la collecziun, las persunas davostiers, la lavur da cataloghisaziun, la perscrutaziun e l'exposiziun sezza. La sopranista Christina Riesch chanta insaquantas chanzuns or da la collecziun. En il rom da l'avertura da l'exposiziun vegn era preschentada la staziun auditiva da la Fonoteca Naziunala Svizra en las localitads da la Biblioteca chantunala dal Grischun.

Exposiziun dals 23 da november 2011 fin il favrer 2012. Vernissascha ils 23 da november 2011, 18.00–19.00 uras en l'emprim plaun da la Biblioteca chantunala dal Grischun.

Tel.: +41 (0)81 284 66 42 Mail: info@drg.ch
Ringstrasse 34, CH–7000 Cuira Fax: +41 (0)81 284 02 04 Internet: www.drg.ch