Sogn Luregn Giustinian, uestg e confessur.

pdf: cheu l'entira historia / Sogn Luregn Giustinian, uestg e confessur
Ils 5 da settember: Sogn Luregn Giustinian, uestg e confessur

Sogn Luregn Giustinian, naschius igl emprem da fenadur 1381 a Veniescha, ei gia da pign ensi staus virtuus e spirtus sco in carschiu. Gia fetg giuvens piarda el il bab. Il quitau dalla mumma meina lu il giuvenet tier grondas vertids, aschia che Luregn daventa in grond survient da Diu. Cun 19 onns retscheiva el ina visiun en fuorma d’ina dunschala che di ch’el dueigi buca encurir pasch denter las vanadads dil mund. Ella seigi la divina sabientscha e vegli metter en ses mauns la vera pasch, sch’el vegni a prender ella per spusa. Consolaus da tala visiun, pren il sogn giuven la resoluziun da suandar igl exempel da Jesus Cristus, il cruzifigau. Plein attenziun patratga el suenter las caussas mundanas, quellas dil stan dils religius e tut quei che tucca da far leutier. Suenter quella examinaziun e cumparegliaziun semeina il bien Luregn viers il cruzifix e di: Miu Segner, Ti eis mia speronza, en quella crusch ei d’anflar refugi e confiert; Tei vi jeu embratschar e suandar. Sin quei banduna el ils da casa e tuts plaschers mundans. A Veniescha retscheiva el en claustra da canonis il vestgiu da pader. Luregn entscheiva immediat a mortificar siu tgierp. Spir humilitonza semetta il sogn sin las gassas per betlergiar almosnas, sto denton raccoltar aviras ed ingiurias. Entras siu fervent urar retscheiva il bien pader da Diu particularas grazias ed era il dun da profetisar. Muort sias biaras vertids consecrescha papa Eugen IV el per uestg da Vaniescha e silsuenter tschenta papa Clau V el igl onn 1451 per emprem patriarc da Veniescha. En sia residenza vertescha il sogn uestg negina pumpa ed era el sez porta adina igl habit ner da siu convent. En sia aulta dignitad resta el adina humiliteivels e migeivels sco sch’el fuss aunc pader. Ils sogns uffecis denton tegn el bein. Suenter ver fundau novas pervendas, reformau clerus e structuras, baghegia sogn Luregn aunc 15 novas claustras tier las 20 existentas. Da tuts mauns vegn la glieud tiel sogn patriarc per dumandar cussegl e benedicziun. Cun sias oraziuns medeghescha sogn Luregn malsauns e scatscha demunis. Senza ver studegiau la grammatica, cumpona e scriva sogn Luregn biars e bials cudischs da ductrina. Staunchels dallas fadigias e cargaus cun merets e sontgas ovras, vegn il sogn patriarc grev malsauns. En sia caplutta retscheiva el il sontgissim Sacrament digl Altar. Purtaus anavos sin sia bisacca da strom di el aunc: Miu Signur Jesus Cristus ei buca morts sin plemas, mobein vid il dir lenn dalla crusch. Il sogn moribund retscheiva ussa il sogn Ieli, dat a sadin nizeivels cussegls, recamonda sesez e sia pleiv a Diu, aulza ils egls encunter tschiel e di: O bien Jesus, ussa vegn jeu tier tei! En bratsch da ses spirituals renda el en quei mument si’olma a Diu ils 8 da schaner digl onn 1455. Cun gronda festivitad ei il tgierp vegnius satraus en la baselgia patriarcala da Veniescha. Muort las biaras miraclas daventadas avon e suenter sia mort, ha papa Alexander VIII igl onn 1690 declarau Luregn Giustinian per sogns.