04:59
Sogn Policarp, uestg e marter. pdf: cheu l’entira historia Ils 26 da schaner: Sogn Policarp, uestg e marter Sogn Policarp, in discipel da sogn Gion evangelist, ei naschius a Smirna entuorn igl onn 70…Daplü
Sogn Policarp, uestg e marter.

pdf: cheu l’entira historia
Ils 26 da schaner: Sogn Policarp, uestg e marter

Sogn Policarp, in discipel da sogn Gion evangelist, ei naschius a Smirna entuorn igl onn 70. Gia d’affon fuva el daventaus sclav, mo vegnius cumpraus libers dalla buna dunna Calista che ha tratg si el en tema da Diu. Calista veva era culs onns surschau ad el il gurvern da sia casa e cheutras prendeva el la caschun da far ovras da misericordia culs paupers e basignus. In di veva Policarp partgiu ora il graun e tut ils fretgs da Calista, denton era rugau Niessegner ch’el vegli cun sia benedicziun turnentar tut quei che fuva partgiu ora. Cura che Calista ha controllau la combra da graun era tut il graun en siu liug. Sin quei ha Calista priu il giuven per siu affon e sulet artavel da tut sia rauba. Suenter la mort da sia patruna Calista steva Policarp bugen persuls cun legier cudischs spirituals ed el urava ditg e savens. El veva era il dun da dar la sanadad als malsauns, da scatschar demunis e da converter herets, gedius e pagauns. Specialmein fuva el cars a sogn Gion evangelist, che guvernava sco bab spiritual tut las baselgias dall’Asia. Muort sia sontga veta eis el vegnius ordinaus spiritual e cuort suenter ha sogn Gion evangelist consecrau el per uestg da Smirna. In tal uffeci ha sogn Policarp adempliu cun gronda premura. Era ha el suffriu bia per ils fauls frars cristians che caschunavan ad el bia discumet. Sogn Policarp viveva suenter igl exempel da meister sogn Gion evangelist. Cun sias grondas e devoziusas oraziuns ha el perfin stizzentau il grond fiug che smanatschava da barschar il marcau da Smirna. Lu ei Sogn Policarp ius a Ruma tier papa Anicetus e referiu quei ch’el veva udiu da sogn Gion evangelist partenent las fiastas pascalas. Turnond puspei en siu uestgiu, han ils imperaturs Marcus Aurelius e Lucius Verus leventau ina criua persecuziun encunter ils cristians. Biars mellis ein vegni marterisai crudeivlamein. Policarp fuva quel che vegliava di e notg e confortava ils zachegiai e tementai. Stazius, il perfect, ha encurschiu quei e dau il camond da pigliar Policarp cun la speronza che lu fussien ils cristians gleiti ragischai ora, cun dismetter quella ferma petga. Mo Diu ha revelau ad el la fin da sia veta sin quella moda: Ina notg en sien pareva ei ad el ch’il plumatsch sut il tgau ardi e vegni consumaus dil fiug. El ha capiu il misteri, clamau ensemen ses confrars e detg: En paucs dis vai jeu d’esser barschaus vivs e Diu seigi ludaus, per quei ch’el vul far meriteivels mei dalla cruna dil marteri.
Treis dis pli tard cumparan ils sbiers avon casa dil sogn. Policarp retscheiva els, lai survir si spisa e bubronda e fa lu oraziun. Lu selai el ligiar ed el vegn menaus el marcau. Sin quei viadi vegn ina vusch giu da tschiel che di: O Policarp, hagies bien cor da cumbatter tafframein per tiu Segner Diu. Duront che Policarp deva avon il derschader perdetga con buns che Diu segi staus cun el, rimnavan pagauns e herets lenna per barschar el vivs. Poliocarp sedostada da schar ligiar el vid in lenn e di: Miu Segner e Diu che dat a mi la veglia da supportar quei fiug, vegn era a dar a mi la forza da star en quel senza esser ligiaus. El serecamonda al Bab celestial e vegn lu fiers sil caset ch’ardeva. Las flomas untgevan el sco in umbriva. Vesend ils sbiers quei fatg marviglius, han els blassau il sogn cun frida mortala e l’olma ei sgulada gloriusamein a tschiel ils 26 da schaner igl onn 168. Cun sogn Policarp ein aunc dudisch auters giuvnals che derivavan da Filadelfia, vegni marterisai. Il sogn tgierp han ils cartents satrau en in honoreivel liug.
Abramo
Senza sogns sco sogn Policarp che siemian dil plumatsch da fiug vegn la baselgia en nossas cuntradas consumadas buca a serevegnir.