Sontga Nesa, purschala e martira.

pdf: cheu l’entira historia

Ils 21 da schaner: Sontga Nesa, purschala e martira

Sontga Nesa, quella dunschala Romana, fuva naschida da fetg buns geniturs catolics. Gia baul sefetschentava ella el zuppau cun la passiun da Cristus e fatg il vut d‘adina vuler restar ina spusa da Jesus. Procopi, il fegl dil guvernatur Simfroni che observa Nesa, leva per tut prezi survegnir quella giuvna per spusa. Denton, Nesa cun pér 12 onns leva saver nuot da quei.
El pren lu la caschun da sez plidentar Nesa e dumandar ella per sia spusa cun presentar ad ella anials, pèdras ed autras rihezias dil mund. Sco sch’ella vess viu ina siarp, untgescha Nesa anavos e di cun vusch resoluta: Va naven da mei ti tentader dil puccau. Buca crei ch’jeu segi malfideivla a miu spus, cun il qual jeu sun unida. Jeu vivel sulettamein da sia carezia e quel ha ornau mei cun pèdras custeivladas. Siu bab ei Diu e sia mumma ei la Purschala Maria. Jeu tegnel el pli car che mia veta ed hai grond plascher da murir per el. Il giuven tut trumpaus da tala resoluta e nunspitgada risposta, ei ius a casa e vegius malsauns. Il guvernatur Simfroni fa lu vegnir la dunschala Nesa tier el, per empruar da volver ella da sespusar cun siu fegl. Mo tut adumbatten. Nesa stat ferma sc’in grep en siu propiest. Ussa vegn ei ad ureglia al guvernatur che la giuvna segi ina cristiana. Cheu di il tiran ad ella: U che ti maridas miu fegl e sacrificheschas il purschaladi alla dieua Vesta, ni che ti vegns menada ora tier las pitaunas publicas. Quella turpegiusa metoda duvravan ils tirans savens encunter las cartentas.
La sontga purschala rispunda: Da tut quei hai jeu negina tema, pertgei miu spus, Niessegner Jesus Cristus vegn a defender mei. Il guvernatur ravgiau dat ussa sia sentenzia e lai trer ora la vestgadira alla sontga giuvna per schar menar ella niua tras las gassas dil marcau. Ferton ch’ins targeva ora sia vestgadira, carschevan ils cavegls da tala maniera ch’els cuvrevan il tgierp dil tuttafatg. Sin quei vegn ella menada tier las pitaunas en ina combra stgira. Leu spetga in aunghel, semtgaus da defender ella cun in bi vestgiu alv cul qual Nesa ha saviu sevestgir. Quels che mava ussa cun schliata intenziun en quella combra, turnavan anora casts, mudests e converti tier il ver Diu.
Era Procopi va ussa en combra per sfurzar la purschala, mo vegn immediat sturnius digl aunghel e croda morts avon ils peis da sontga Nesa. Tuts cartevan che Nesa vessi mazzau il giuven. Ella semetta en schanuglias en oraziun per mussar la pussonza e la gloria da Diu. Aschia urbescha ella ora che Procopi daventa puspei vivs e dat perdetga da tut quei che la sontga haveva giu detg ad el. Mo ils auters han mirau quella miracla per rampins diabolics. Perquei vulan els far murir ella. Simfroni che veva buca pli la forza da turmentar sontga Nesa, surdat ella a siu fumegl per barschar ella viva. Mo il fiug ha buca pudiu far donn alla sontga dunschala che urava. Per quietar la ravgia dils pagauns ha Aspasi lu cumandau da scavazzar ella. La sontga dat schizun curascha al …