04:56
Sogn Processus e sogn Martinian, marters. pdf: cheu l'entira historia/ Sogn Processus e sogn Martinian, marters Ils 3 da fenadur: Sogn Processus e sogn Martinian, marters Imperatur Nero veva ord spir …Daplü
Sogn Processus e sogn Martinian, marters.

pdf: cheu l'entira historia/ Sogn Processus e sogn Martinian, marters
Ils 3 da fenadur: Sogn Processus e sogn Martinian, marters

Imperatur Nero veva ord spir gretta schau metter a ferm ils apostels sogn Pieder e sogn Paul en la perschun Mamertina. Denter ils schuldaus che pertgiravan las perschuns, fuvan era Processus e Martinian, dus ufficials digl imperatur. Mintgadi vesevan quels dus tontas miraclas dils dus sogns, ch’els han entras quei entschiet a dubitar e detg: Tgi less cheu aunc dubitar ch’il Diu dils cristians fussi buca il sulet ver Diu. Cu han nos dieus Jupiter, Mars, Saturn ed auters fatg ina miracla entras lur ministers? E tgei schliata veta ei la nossa, cumparegliau cun quella ch’ils cristians meinan? Omisdus visetan ussa ils sogns apostels en perschun schend ad els: Cartei buca che Nero hagi emblidau vus cun schar vus 9 meins en perschun. Vus essas ussa libers, mo igl emprem rughein nus vus per il sogn Batten. Ils sogns apostels selegran da quei e declaran ad els il misteri dalla sontgissima Trinitad. Quei discuors audan era auters perschuniers pagauns e tuts cloman da cuminonza: Sche vies Diu ei schi pussents sco quei che vus scheis, lu duei el schar nescher cheu aua frestga per levgiar nossa gronda seit. Sogn Pieder aulza la vusch, examinescha lur cardientscha e fa sil grep giun plaun l’enzenna dalla sontga crusch. Ladinamein nescha leu ina fontauna che cuora aunc ozildi en quei liug. Cun quella aua battegia sogn Pieder ussa Processus, Martinian ed aunc 47 auters perschuniers. Quella nova ei prest stada derasada pigl entir marcau entuorn. Il guvernatur Paulinus lai ussa clamar il dus schuldaus avon el. Cun grond curvien ch’els hagien bandunau ils dieus da lur reginavel, roga el ils dus perderts umens da puspei turnar anavos tier lur religiun. Mo ils dus taffers confessurs da Cristus rispundan: L’entira veta essan nus vivi en ina miserabla tschoccadad ed ussa ha Diu regalau a nus glisch e grazia da puder enconuscher nos falliments, da seconverter ed adurar il sulet ver Diu. Nus essan cristians, selegrein da saver purtar tal num ed essan semtgai da sponder nies saung per amur da Cristus e sia cardientscha. Vesend il tiran che nuot po volver els, camonda el a ses sbiers da rumper a Processus ed a Martinian dents e missialas. En quei mument aulzan ils dus sogns lur egls encunter tschiel e cloman cun aulta vusch: Gloria in excelsis Deo! Sin quei lai il tiran purtar neutier in vut da Jupiter per ch’els adurien quel. Ils dus cavaliers da Cristus mo rian sur da quei, fan beffas e spidan en fatscha alla figura pagauna. Aunc pli ravgiaus lai il grobian stender els vid il tgierl e torturar a moda zun crudeivla. Duront las horriblas torturas laudan ils dus sogns Diu cun exclamar: Tiu num, o Segner, seigi adina benedius! Paulinus piarda anetgamein in egl ed il demuni entra en el. Treis dis pli tard ei il tiran lu morts desperadamein. Pompilius, il fegl dil tiran rapporta ussa tut il schabeiau agl imperatur ed urbescha ora ch’ils dus culponts ch’els tenevan per striuns, vegnien scavazzai. La sentenzia ei dada ed ils sogns marters vegnan menai o en la via Aurelia e scavazzai ils 2 da fenadur entuorn igl onn 70. Lucina, ina sontga dunna romana leu presenta, rimna ils corps, unscha quels cun custeivels ielis e satiara els sin siu funs. Pli tard ein las reliquias vegnidas tschentadas en la baselgia da sogn Pieder. Sco sogn papa Gregori scriva, daventavien gia da siu temps zun biaras miraclas sper lur fossa. La Baselgia fa atgnamein memoria dils dus sogns marters sco ier, il di da lur marteri.
Plaisch
Interessanta veta. Il di liturgic dils 2 da fenadur ei buca per cass, ei setracta dalla via dil salit: Nossadunna porta Niessegner tier Gion Battesta, ed ils marters dattan la grazia dalla cardientscha als auters perschuniers.
Quei schabegia en la Baselgia catolica, ch'ei representada perfetgamein en Nossadunna che Niessegner cloma Dunna, femna, muort sia qualitad da schendrar surnaturalmein.
Quella …Daplü
Interessanta veta. Il di liturgic dils 2 da fenadur ei buca per cass, ei setracta dalla via dil salit: Nossadunna porta Niessegner tier Gion Battesta, ed ils marters dattan la grazia dalla cardientscha als auters perschuniers.

Quei schabegia en la Baselgia catolica, ch'ei representada perfetgamein en Nossadunna che Niessegner cloma Dunna, femna, muort sia qualitad da schendrar surnaturalmein.

Quella generaziun dalla veta perpetna ei lu fatga veseivla ella fontauna que sogn Pieder lai scaturir.

Ualti savens el calender liturgic fruntan dus sogns che intimamein han da far ensemen, era sche ordeifer ils ein diltuttafatg differents, il pli savens fruntan marters cun confessurs. Ils marters muossan lu l'oraziun e ils confessurs la grazia ni ils fretgs.

"Tgei vein nus da far ensemen?" damonda Niessegner sia mumma a Kana: igl ei igl origin divin dalla missiun e dalla Baselgia catolica.