04:05
Sogn Anacletus, papa e marter. pdf: cheu l'entira historia / Sogn Anacletus, papa e marter Ils 13 da fenadur: Sogn Anacletus, papa e marter Sogn Anacleus, il quart papa suenter sogn Pieder, fuva …Daplü
Sogn Anacletus, papa e marter.

pdf: cheu l'entira historia / Sogn Anacletus, papa e marter
Ils 13 da fenadur: Sogn Anacletus, papa e marter

Sogn Anacleus, il quart papa suenter sogn Pieder, fuva oriunds da Athena en Grecia. Siu talentau buob ha il bab mess a scola, per ch’el daventi in qualificau um. Sogn Pieder ch’ei arrivaus ad Athena, ha immediat viu che quei mattatsch savessi daventar in fideivel survient da Diu. Anacletus ha capiu las raschuns da sogn Pieder ed ha acceptau dad el la cardientscha da Jesus Cristus. Suenter esser battegiaus, carscheva el taluisa en pietad che sogn Pieder ha ordinau el diacon e cuort sisu augsegner. Sco sacerdot surveva Anacletus a siu meister sogn Pieder en tuttas funcziuns e cumpignava el sils viadis apostolics. Sco vegliont pastur dallas olmas ei Anacletus suenter il marteri da papa sogn Clemens daventaus papa. Da quei temps digl imperatur Trajanus era la Baselgia da Cristus fetg persequitada. Plazzas e gassas fuvan bugnadas cul saung dils cristians che vegnevan mintga di marterisai. Dapertut stevan cruschs, fuortgas, rodas, tgierls ed auters instruments dalla mort semtgai. Uestgs e spirituals fuvan ils emprems che stuevan sponder lur saung. Cun quei manegiavan ils tirans da puder spattitschar las nuorsas. Ils sogns apostels Pieder e Paul havevan dau lur veta per Jesus Cristus e semegliontamein era ils dus sogns Linus e Cletus. Ord quella situaziun dalla sontga Baselgia sa scadin cumprender con ch’ei ha tuccau ad Anacletus da luvrar e suffierer per guvernar quella nav da sogn Pieder. Igl esser cristian da quei temps fuva, sco da ver il cunti vid la gula. Per mantener la disciplina ecclesiastica ha quei sogn papa fatg enzaconts nizeivels statuts. Denter quels statuts ha el vuliu, che per consecrar in uestg, stoppien treis auters uestgs esser presents allas ceremonias. Lu ha el era vuliu ch’ils spirituals vegnien ordinai da lur agens uestgs e quei publicamein, sinaquei che scadin sappi enconuscher las vertids ed ils merets da quels che vegnien ordinai. Plinavon ha il sogn era scret enzacontas fetg nizeivlas brevs per il bien guvern dalla Baselgia. Per enzenna d’engraziament e devoziun enviers sogn Pieder che veva dau ad el la vera cardientscha, ha sogn Anacletus baghegiau sur la fossa da quei grond apiestel ina baselgia e numnau quella la victoria dils apostels. Duront la persecuziun ei quella adina restada schurmegiada. El vatican ha il sogn papa benediu ora in liug per satrar ils papas ed el santeri dils cristians reservau in liug per satrar ils sogns marters. Gie, en tuts graus ha quei grond vicari da Cristus mussau profunda pietad, nunsurveseivla premura, generusad ed ardenta carezia per la honur da Diu e per il salit dallas olma. Finalmein suenter haver regiu la sontga Baselgia duront nov onns cun grondas miserias e fadigias, eis el vegnius marterisus ils 13 da fenadur digl onn 88.
Abramo
Tenor ils plaids da quella gronda persunalitada lein nus better crappa sin negin. Buca mo buc sin quels che quella gronda persunalitad numna «gay», mobeina era buca sin quels ch'ein forsa buca «gay».
Plaisch
@Abramo
Tgei vul quella citaziun dir: Chi sono io per giudicare i gay.
Capeschel buca il connex.Daplü
@Abramo
Tgei vul quella citaziun dir: Chi sono io per giudicare i gay.

Capeschel buca il connex.
Abramo
Tgei caussas! Quei era temps nua ch'ils papas murevan sco marters e perdetgas per la cardientscha. Oz fuss quei inimaginabel. Denton era cheu vala il plaid d'ina gronda persunalitad: Chi sono io per giudicare i gay."
Plaisch
Engraziel fetg per quei bi portret.
Anacletus munta "clamaus anavos, ni ensi", vus veis bein fatg percorscher la raschun da quei num: perquei che sogn Pieder veva engartau il talent ha el clamau il buob el survetsch eclesiastic.
la preposiziun aná ei "anavos agl origin", igl origin ei Dieus che tut scaffescha. Anaclet ei vegnius retratgs per menar la Baselgia.
Ch'el ha matei bein gartegiau. Quel …Daplü
Engraziel fetg per quei bi portret.

Anacletus munta "clamaus anavos, ni ensi", vus veis bein fatg percorscher la raschun da quei num: perquei che sogn Pieder veva engartau il talent ha el clamau il buob el survetsch eclesiastic.

la preposiziun aná ei "anavos agl origin", igl origin ei Dieus che tut scaffescha. Anaclet ei vegnius retratgs per menar la Baselgia.

Ch'el ha matei bein gartegiau. Quel roghi per nus. OZ.