L’Uniun Pro Idioms translatescha e stampa
L’Uniun Pro Idioms procura per il mied da quens
dall’ emprema classa els idioms
L’Uniun Pro Idioms ha translatau e stampau il mied da quens dall’emprema classa els idioms dallas regiuns che han mussau interess: puter, vallader e sursilvan. Las vischnauncas dalla Surselva e dall’Engiadina ch’instrueschan igl idiom en scola vegnan a far diever dil mied translataus dalla Pro Idioms. Senza la Pro Idioms vessen quellas vischnauncas sil proxim onn da scola buca il mied da quens obligatori en lur lungatg ufficial da scola.
La Pro Idioms engrazia allas persunas dil fatg che han translatau il niev mied da quens els idioms ed allas numerusas vischnauncas e privats che han susteniu idealmein e finanzialmein la realisaziun da quel. Aschia sa vegnir garantiu che il niev mied da quens cumpara en treis idioms sin l’entschatta digl onn da scola 2011/2012. Ussa han tut las scolas romontschas ils medems buns mieds da matematica. Per auters mieds d’instrucziun obligatoris ei il problem aunc buca sligiaus.
Sin quei onn da scola ha il departement d’educaziun declarau obligatori plirs mieds d’instrucziun per rumantsch grischun per tut las scolas romontschas, era per quellas che instrueschan igl idiom. Quella decisiun sebasa sin il conclus ch’il cussegl grond ha priu igl onn 2003 dad edir ils mieds d’instrucziun mo pli per rumantsch grischun.
Cun proponer ella nova lescha da scola d’edir puspei ils mieds obligatoris era els idioms, conceda da la regenza grischuna che la decisiun digl onn 2003 cunterfa alla constituziun cantunala (art. 3). Era sche la decisiun dalla regenza va ella dretga direcziun restan plirs problems buca sligiai. Ei sectracta numnadamein mo dad ina sligiaziun da cumpromiss.
La finamira dalla Pro Idioms ei che tut ils mieds d’instrucziun relevants che vegnan instrui en la scolas grischunas vegnan edi era els idioms, denter auter era ils mieds pils roms reals. Tenor las declaraziuns dalla regenza grischuna vegnan mo ils mieds dils roms romontsch e matematica translatai els idioms. La Pro Idioms ei dil meini che tut ils scolars grischuns/las scolaras grischunas han il dretg dad ina instrucziun interessanta, moderna e varionta, independentamein da lur lungatg da scola.
Il mied da quens dall’emprema classa da quen san era persunas privatas retrer naven dils 17 d’uost tier il secretariat dalla Pro Idioms:
079 367 08 96
PRO IDIOMS
www.proidioms.ch
