Clicks1.3K
Novitads

Legreivel, denton aunc buca cuntenteivel

PRO IDIOMS 16-08-2011 NOVITADS NR. 4

Legreivel, denton aunc buca cuntenteivel

Dapi sia fundaziun sestenta la Pro Idioms Engiadina/Surselva d’anflar mieds e vias co revocar la decisiun dil Cussegl grond digl onn 2003 stada proponida da gliez temps dalla Regenza grischuna, ina decisiun che cunterfa alla constituziun. Il pass che la Regenza fa ussa arva la via per ina detensiun e per ina pausa da reflecziun en ina situaziun hanada, scaffend cheutras spazi e temps per in niev giudicament.


Generalmein ei quei da beneventar ed igl ei d‘engraziar all’entira Regenza grischuna, en special al cau dil departament d’educaziun, cultura ed ambient, en uffeci dapi igl 1. da schaner 2011, anteriur scolast Martin Jäger. La decisiun principiala dalla Regenza ei senza dubi d’impurtonza centrala per las scolas romontschas e vegn ad influenzar pigl avegnir il giudicament cumplessiv dalla damonda dispiteivla davart il diever dil rumantsch grischun respectivamein dils idioms. Las formulaziuns dalla Regenza ch’ein d‘anflar ella pressa entochen ussa fan tuttina sedumandar, schebein la proposta presentada po propi menar ad ina sligiaziun cuntenteivla. Daco?

Las novas propostas dalla Regenza cuntegnan differentas damondas relevantas nunclaras, sco p.ex. la damon da tgei mieds che vegnan alla finfinala edi effectivamein els idioms. Tals puncts nunclars ha ei num examinar pli da rudien avon che trer conclusiuns. Perquei vegn la Pro Idioms Engiadina/ Surselva ad observar fetg attentamein las instanzas che vegnan a tractar ils singuls artechels dalla nova lescha da scola e sias ordinaziuns. La Pro Idioms Engiadina/Surselva, purtada activamein da varga 4‘000 persunas, resalva expressivamein il dretg da revegnir a quellas differentas damondas cun tut ils dretgs che paran buns ed indicai ad ella, aschigleiti ch’ei dat declaraziuns pli claras e precisas davart il cuntegn. Il Parlament grischun ha ussa la pusseivladad – risguardond la constituziun cantunala vertenta – da menar la damonda davart il lungatg d’instrucziun dallas scolas romontschas ad ina buna fin.

La nova situaziun dat speronza ch’ei vegni anflau ina buna sligiaziun. Enzatgei para denton evident: La confidonza sgurdinada malamein duront tut quels onns en connex cun quellas damondas da lungatg sa mo pli vegnir recuperada, sch’ei regia da tuttas varts stenta sincera, transparenza e consequenza logica.

PRO IDIOMS
www.proidioms.ch