03:00
L'annuncio dell'Angelo a Giuseppe in VERSI SICILIANI a cura di PADRE GIUSEPPE LICCIARDI. L'annuncio dell'Angelo a Giuseppe in VERSI SICILIANI a cura di PADRE GIUSEPPE LICCIARDI. Di seguito le strofe …Altro
L'annuncio dell'Angelo a Giuseppe in VERSI SICILIANI a cura di PADRE GIUSEPPE LICCIARDI.

L'annuncio dell'Angelo a Giuseppe in VERSI SICILIANI a cura di PADRE GIUSEPPE LICCIARDI. Di seguito le strofe per leggere durante l'ascolto.

L’ANNUNZIU DI L’ANCILU A GIUSEPPI
(Matteo 1, 18-24)


Tri misi e jorna avianu passatu
ncasa d’Elisabetta, unni aspittatu
a nascita i Giuvanni avìa Maria.
Ma u tempu vinni i méttisi p’a via,
ca a Nazaret turnari idda vulìa,
ca chiddu chi purtava si vidìa
ed ammucciari ormai un lu putìa,
ca nta so panza ogni jornu criscìa.

Giuseppi un vidìa l'ura ca turnava,
c'assai la so prisenza ci mancava.
Ma appena ca idda arriva e la talìa,
subitu pensa: “Ncinta eni Maria!
Ma comu potti chistu capitari
si nsemmula nun c’emu jutu a stari?”.
E lu primu pinseru è un gran turmentu,
ca si putìa trattari i tradimentu!

E un focu la so menti fa avvampari,
ca nun è cchiù capaci di pinsari.
Giuseppi è un'omu giustu e lu so cori
quasi ci scoppia, ca pi picca un mori.
E dintra s’addumanna: “C’haiu a fari?
Accusalla pi falla cunnanari?
Ma iu un ci pozzu cririri, e un mi sentu
di falla cunnannari i tradimentu.

Forsi è megghiu ca mpaci a lassu stari
e a taci maci a vìu di ripudiari.”
Si curca, dormi anticchia e s’arrusbigghia,
ca lu sonnu ci veni a lassa e pigghia
pi lu pinseru ca un lu lassa mpaci
e chi lu fa avvampari comu braci.
Poi s'addummisci e un ancilu ci appari
e duci duci cumincia a parrari:

"Figghiu i David, Giuseppi, un ti scantari!
Dumani tu a Maria vai a truvari
ci dici ca a to casa a vô purtari
pi muggheri e cu tia ora havi a stari.
Lu figghiu ch’intra ad idda ora è sarbatu
di lu Spiritu Santu è generatu.
Appena ch’Iddu nasci di Maria,
lu nomu tu ci duni, e “Gesù” sia.

"Gesù", ca pi salvari fu mannatu
l’omini ncatinati du piccatu.
Lu Signuri l’avìa preannunziatu
quannu u profeta avìa accussì parratu:
“Matri addiventa a virgini, Emmanueli
si chiama u figghiu, picchì u Diu di celi
è cu nuatri!”. Giuseppi s’arrusbigghia
ed a Maria pi muggheri si pigghia.

Giuseppe Licciardi (Padre Pino)