Sontga Martina, purschala e martira.

pdf: cheu il video dalla sontga
Ils 30 da schaner: Sontga Martina, purschala e martira

Sontga Martina ei naschida a Ruma. Ses nobels e rehs geniturs eran fetg pietus e premurai d‘educar bein lur feglia. Ella ha piars fetg baul ses geniturs e leva suletamein daventar ina virtuusa spusa da Diu.
Da quei temps ch‘igl imperatur Alexander Severus regeva, vegnevan ils cristians fetg persequitai dils pagauns. Era Martina vegn sco cristifideivla tgisada e menada avon igl imperatur. Ella vegn sfurzada dad ir el tempel per far in sacrifeci al diu Apollo. La purschala va, fa l’enzenna dalla sontga crusch e roga Diu da disfar quei vut dil fauls diu. Sin quei suonda in horribel tiaratriembel che strembla igl entir marcau. Apollo cun ina part dil tempel croda per tiara e sturnescha entgins pagauns. Il ravgiau imperatur camonda uss als sbiers da bastunar la dunschala e pender si ella niua vid la bratscha per gheslegiar e torturar ella cun grefflas da fier. Ils hentgers sezs vegnevan staunchels e stuevan dar tier ch’els seigien pli mudergiai che la dunschala sezza.
Sontga Martina urava, ludava Diu e scheva: Benedius seigies Ti, o Segner, che das grazia a tuts quels che sefidan da Tei! Exauda mei e dai a mi la pazienzia ed a mes turmentaders dai la grazia ch’els seconvertien tier Tei!
Duront che las sontga urava, vegnevan ils hentgers circumdai d‘ina clarezia, che penetrava els cun tarlischur. Els crodan cun lur fatschas per tiara e rogan per perdun pil mal ch’els vevan commess encunter sontga Martina e cloman: Nus cartein fermamein enten Jesus Cristus, sbittein la religiun pagauna e lein murir per amur dil ver Diu, ch’ei Jesus Cristus. Sin quei vegnan ils otg hentgers immediat mess sil tgierl e silsuenter scavazzai. Quei ei schabegiau ils 27 da november digl onn 235.
Sontga Martina ha il tiran aunc schau torturar sgarscheivlamein duront 44 dis.
Cun crutschs da fier han ils sbiers sgarflau il tgierp dalla sontga, aviert grondas plagas e silsuenter mess ella en perschun. Tutta notg ha ella cantau e ludau Diu ensemen culs aunghels.
L’auter di vegn sontga Martina menada el tempel dalla dieua Diana per assister al sacrifeci. Cheu fa ella la sontga crusch e camonda al demuni d‘untgir da quei tempel. Quel sto obedir e fui cun stermentusa canera. En quei mument entscheiva il tschiel a rumplanar e camegiar horriblamein. In fiug croda d‘ina nebla e devastescha il tempel cun la Diana e biars dil pievel restan leu morts en quella muschna.
Igl imperatur tementau fui e surlai a siu stattalter da torturar vinavon Martina, perquei che lezza sbittava la religiun pagauna.
Sin quei vegn Martina lu runada pli morta che viva en perschun e suenter fiersa avon ils liuns che fan ina reverenza avon ella e van naven. Tut desparaus fiera igl imperatur ella en in grond fiug ed era quel po far negin donn alla sontga. Aunc adina buc avunda. El lai serrar Martina treis dis e treis notgs el tempel da Jupiter, cun la speronza che lez damogni da volver ella. Suenter quels treis dis, cura ch’il tempel ei …