Clicks427

Sogn Benedetg, pastur e confessur

pdf: cheu l'entira historia Sogn Benedetg, pastur e confessur Ils 14 d’avrel: Sogn Benedetg, pastur e confessur Sogn Benedetg ei naschius igl onn 1165 en in vitget dalla Frontscha, e fageva il pastur…More
pdf: cheu l'entira historia
Sogn Benedetg, pastur e confessur
Ils 14 d’avrel: Sogn Benedetg, pastur e confessur


Sogn Benedetg ei naschius igl onn 1165 en in vitget dalla Frontscha, e fageva il pastur da nuorsas damaneivel d’Avignon. Quei bien educau affon ha piars baul ses geniturs. Cun 12 onns ha Diu favorisau el cun in special clom. Quei di ei il sulegl sestgirentaus cu el era sin pastira cun las nuorsas. Cheu auda el treis ga ina vusch che di: Miu car fegl Benedetg, teidla la vusch da Jesus Cristus! Il giuvenet tema pir che mai, pertgei el udeva a plidar, mo veseva negin. Cristus ei lu sedaus d’enconuscher e detg: Buca tema, jeu sun Jesus Cristus, il scaffider dil tschiel e dalla tiara e viel che ti teidlies miu camond. Va e construescha ina punt sur il flum Rodan vi. Sin las stgisas e dubis da buca saver far quella lavur, ha Cristus danovamein dau quei camond e sincerau tut necessari agid. Lu cumpara in aunghel e cumpogna Benedetg tiel flum, schend: Lai menar tei sur l’aua vi, va tiegl uestg e lai saver il camond da Cristus. Per tut igl auter vegn Diu a procurar. Arrivaus a l’autra riva, va Benedetg ad Avignon, entra en la baselgia gronda, nua ch’igl uestg Ponzius gest perdegava e cloma cun aulta vusch: Tedlei e dei adatg! Jesus Cristus ha tarmess mei cheu per baghegiar ina punt sur il Rodan vi. Uestg e pievel han teniu quei per narradads e menau il buob giado tiel president dil marcau. Mo era quel tegn zatgei semegliont per stuorn. Benedetg ha cun vusch affonila detg: O signur, jeu sun cheu tarmess da Diu per baghegiar ina punt sur il Rodan vi e vai da basegns da vies agid. Il president vul pia tuttina schar far l’emprova e schenghegia al giuven il pli grond crap ch’el veva en sia cuort per crap da fundament. 30 umens vessan buca dumignau quel naven, mo Benedetg va tiel crap, fa l’enzenna dalla sontga crusch e pren quel senza gronda breigia sin siu tgau e porta quel levamei nua che la punt dueva prender si’entschatta. Tras quella miracla han signurs e burgheis dau grondas summas daners, aschia che las lavurs han saviu vegnir fatgas. Bia glieud vegneva neutier per gidar voluntariamein. Siat entirs onns ha sogn Benedetg baghegiau vid quella lada punt cun 19 artgs tschentai sin pilasters e quei per grond smarvegl dil mund. Duront quei temps ha el era construiu in spital pils pelegrins che passavan savens leu speras vi. Mo igl inimitg infernal ha sin tuttas modas encuretg d’imperdir e disfar quella lavur. Mo adumbatten. La punt fuva ussa ton sco finida e sogn Benedetg veva 19 onns. Cheu ha el giu ina revelaziun che la fin da sia veta s’avischini. Ina leva malsogna ha levgiau ad el il viadi vi en la perpetnadad. Bein provodius cul sogns Sacraments ha el ils 14 d’avrel digl onn 1184 rendiu sontgamein siu spért a Diu. Cun gronda solemnitad ei il giuven vegnius satraus tenor siu giavisch en sia caplutta ch’el veva baghegiau el tierz pilaster dalla punt, nua ch’el veva passentau ed urau biaras uras. Sin sia fossa daventavan di per di biaras mairaclas. Sinquei ha papa Innocenz IV igl onn 1245 sanctificau e canonisau quei benediu pastur e survient da Diu. Suenter zacons tschiens onns ha la devoziun tier sogn Benedetg schau suenter e la punt smanatschava da dar ensemen. Cheu ei il sogn tgierp che fuva aunc intacts e frestgs vegnius allontanaus ord la caplutta e transmess en ina baselgia dil marcau.