Clicks4.5K

Sogn Gliezi, retg, uestg e marter

pdf: cheu l’entira historia Ils 3 da december: Sogn Gliezi, retg, uestg e marter patrun principal digl uestgiu da Cuera Sogn Gliezi ni Leci ei staus retg dall’Engheltiara sco quei che siu bab, siu …More
pdf: cheu l’entira historia
Ils 3 da december: Sogn Gliezi, retg, uestg e marter
patrun principal digl uestgiu da Cuera


Sogn Gliezi ni Leci ei staus retg dall’Engheltiara sco quei che siu bab, siu tat e siu basat fuvan gia stai. Da quei tems ch‘il sogn regeva la Britania deva ei aunc adina zun biars pagauns en la tiara. Sogn Gliezi sez che fuva tratgs si e vivius in grond temps en la religiun pagauna, ha mai sbittau la cardientscha dils cristians e fuss bugen era sez daventaus in cristian. Mo per tema da persecuziuns ed uiaras ha el zuppentau vi da vuler vegnir catolics, entochen ch’il temps fussi madirs e las circumstanzias lubeschien.
Igl onn 147 ha imperatur Marcus Aurelius Antonius stuiu far uiara encunter ils Moriviers e Bremers. Cun agid dils Vandeles, Polacs e Schuobs vevan els tschinclau en l’armada romana, ch’ella steva en grond prighel da pirir dalla calira e dalla seit.
En quellas grondas miserias ha in colonel dalla guardia detg agl imperatur ch’el hagi en siu regiment ina cumpignia cristiana; el duessi dar a quels il camond da far oraziun tier Diu per proteger imperatur e si’armada. Sin l’oraziun da quels tarmetta il tschiel plievgia, mo sulettamein sur dil camp dils Romans che han saviu sefrestgentar e dustar la seit.
El camp digl inimitg Tudestg denton, ha ei dau ina stermentusa tempiasta cun tun e cametg ed ils paliats turnentava il vent puspei anavos enviers els. Entras quei ein biars vegni mazzai, auters mavan vi tier ils Romans ni prendevan la fuigia. Cun quella victoria ha igl imperatur che haveva survegniu grond‘affecziun pils cristians, tarmess a scret il schabegiau al senat da Ruma cul camond da buca pli persequitar ils cristians, mobein schar viver els lur cardientscha cun ruaus. A Ruma ein sin quei biars cavaliers e senaturs sedeclarai catolics e retschiert il sogn Batten. Era sogn Gliezi ha schau dar tutta tema e tarmess ambassadurs tier il papa Euleutheri a Ruma cun la supplica ch’el duessi tarmetter enzacons docturs e mussaders dil sogn evangeli en siu reginavel ell’Engheltiara. Ussa ha era il retg sogn Gliezi cun sia sora Miertha, ses subdits e l‘entira cuort retschiert il sogn Batten. Il sogn fuva taluisa scaldaus dil Spért sogn ch’el vuleva ussa sez far il predicatur dil sogn evangeli. El metta giu cruna e scepter, sbetta las rihezias e la pumpa dil mund e dat il pietigot a patria e parents. Cun in fest enta maun e paupramein vestgius va el sur mar, tras la Frontscha a Bavaria e da leu el Schuob. Ad Augsburg ha sogn Gliezi convertiu e battegiau biars ed era leu baghegiau l’emprema baselgia catolica. Ils stinai pagauns pudevan denton buca vertir il mussader dalla verdad e catschau el cun crappa, lenna e melli aviras naven. El ei viagiaus sur Ratisbonna tochen el Stiria e da leu semanaus el Tirol cun semnar dapertutanavon la ductrina da Cristus. La finala arriva sogn Gliezi en nossa tiara Grischuna e secasa melli pass sur Cuera en ina grotta che vegn aunc oz numnada la grotta da sogn Gliezi.
Cheu ha el menau ina zun sontga …