04:49
Sogn Giusep Calasanzi, confessur. pdf: cheu l'entira historia Sogn Giusep Calasanzi, confessur Ils 26 d’uost: Sogn Giusep Calasanzi, confessur Quei grond survient da Diu ei naschius ils 11 da settember …Daplü
Sogn Giusep Calasanzi, confessur.

pdf: cheu l'entira historia
Sogn Giusep Calasanzi, confessur

Ils 26 d’uost: Sogn Giusep Calasanzi, confessur


Quei grond survient da Diu ei naschius ils 11 da settember digl onn 1556 en Aragona, ina provinzia dalla Spagna. Gia da buob veva Giusep empriu da dir il Bab nos ed el enconuscheva era bein ils pugns principals dalla ductrina cristiana. Quei plascheva ad el schi bein ch’el clamava savens ensemen affons e fageva cun quels ductrina. Gia cun 5 onns ha Giusep entschiet a cumbatter il demuni. Enviers il sontgissim Sacrament digl altar e Nossadunna ardeva siu cor tut aparti. Aschia carscheva el en vertids. Per ses sogns patruns veva el eligiu Nossadunna e sogn Giusep. Gia cun 16 onns fageva el bia penetienzias e giginas. El senutreva mo inaga el di cun paun ed aua, durmeva pauc e quei savens sin la blutta tiara. Aunc fetg giuvens ha Giusep fatg avon igl altar da Nossadunna il vut da perpetna castiadad. Igl onn 1583 ha el doctorau, daventaus augsegner e professer dalla teologia. Muort sia gronda sabientscha e sia veta exemplarica han enzacons uestgs dumandau el per agid da metter lur uestgius puspei en bien uorden ed en buna disciplina. En cuort temps veva el dismess ils schliats vezis e las malas disas. Ils spirituals fuvan ussa pli fervents ed exemplarics ed ils seculars pli obedeivels a lur superiurs. Entras ina visiun dil tschiel eis el seresolvius da bandunar la Spagna. Igl onn 1592 ha Giusep partgiu ora sia rauba als paupers e serendius a Ruma per entrar en ina confraternitad che segidava culs pli paupers e malsauns. Igl onn 1596 ei rut ora a Ruma la muria. Sogn Giusep e sogn Camillius prendevan scalas per ir da finiastra en e purtar als malsauns vivonda ed ils sogns sacraments dils moribunds. Per che quellas ovras maunchien buca in di, ha sogn Giusep fundau il niev uorden cul num „Scholarum Piarum“. Per mantener e carschentar quei uorden dallas „Scolas pias“, sco el vegn numnaus, ha sogn Giusep stuiu luvrar e pitir bia. Pervia da manzegnas e rampins da dus da ses confrars, eis el schizun vegnius fatgs perschunier dil sogn uffeci. Pia ina gronda vergugna enviers in um che veva luvrau ton per Diu e per ils pli paupes dils paupers. Cun quei ha Diu mess siu survient sin emprova per schar veser il mund con ch’in ver survient da Diu e da Maria possi suffrir. Sogn Giusep sco emprem fundatur dallas scolas pias, deva era sez scola e ductrina als paupers affons e procurava per tut igl uorden da scola. Dasperas medegava el malsauns, scatschava demunis e fageva aunc biaras autras ovras da misericordia. Pliras ga ei Maria la Regina dil tschiel cumparida ad el, consolau ed empermess tut sustegn sin pugn da mort. Igl onn 1648 eis el vegnius taccaus d’ina malsogna che ha cuzzau in meins. Cheu cumpara Nossadunna bunamein mintga notg ad el e dat d’entelgir ch’ella seigi la protectura digl uorden dallas scolas pias. Cun prest 92 onns, ils 25 d’uost 1648, bein provedius culs sogns sacraments dils moribunds, eis el spartius cun clamar treis gadas Jesus, Jesus, Jesus! Muort las biaras miraclas daventadas avon e suenter sia mort, ha papa Clemens XIII canonisau Giusep da Calasanza solemnamein igl onn 1767. Suenter schi liung temps fuvan sia lieunga e siu cor aunc adina bein conservai.
Plaisch
Engraziel fetg per quei bi portret. In dils gronds sogns pedagogs dil tschiel.