Gloria.tv And Coronavirus: Huge Amount Of Traffic, Standstill in Donations
Clicks708
Novitads

La PRO IDIOMS innovescha l‘instrucziun

PRO IDIOMS 03-01-2013 NOVITADS NR. 8

La PRO IDIOMS innovescha l‘instrucziun

A caschun dalla Conferenza generala romontscha dallas scolastas e dils scolasts dalla Surselva che ha giu liug ils 21 da november 2012 a Mustér, ei il niev mied d’instrucziun ACCESS per las classas 2-9 dalla scola populara vegnius presentaus. Il mied sviluppaus dalla Pro Idioms Surselva consista da dus corps: in tgierp ei fisics en fuorma da fegls en format A4 cun in ordinatur creaus aposta, l’auter tgierp ei virtuals ed ei d’ anflar silla plattafuorma d’emprender online cul num Moodle.

Moodle – ina plattafuorma singulara
Moodle ei ina da numerusas plattafuormas d’emprender online. Varga 68 milliuns en 223 differentas tiaras fan diever dalla plattafuorma translatada entochen ussa en rodund 110 lungatgs, novissimamein era en sursilvan entras la Pro Idioms. Las differentas plattafuormas d’ emprender online porschan oravontut l'administraziun d'ina classa, forums, in calender e la pusseivladad da communicar denter scolars e scolasts. Sper quels moduls fundamentals porscha Moodle denton aunc la pusseivladad da crear tests, schar dar resuns, far votaziuns, dar incaricas, far diever da glossaris ed ulteriurs moduls specifics. Sin Moodle san las scolastas ed ils scolasts surtut era observar cu, con ditg e cun tgei success che lur scolars e scolaras lavuran online. Quei ei singular. En Svizra fan oravontut universitads e scolas aultas diever da Moodle che ei sil livel il pli ault da quei ch'ina plattafuorma online sa esser. Moodle che deriva dall’Australia ed exista gia dapi igl onn 1999 vegn actualisaus di per di da numerus programmaders.

Moodle ed ACCESS per novas vias
La colligiaziun rufinada denter Moodle ed il niev mied d’instrucziun ACCESS ei vegni da realisada da Marc Thoma, scolast ed programmader da Cuera. Il fatg che ina plattafuorma online vegn ussa duvrada en cumbinaziun cun in mied d’instrucziun ei in novum. Ei dat negliu zatgei semegliont entochen oz. Cul mied d’instrucziun ACCESS vegn pia incaminau ina via diltuttafatg nova e singulara, buca mo sil sectur dils mieds d’instrucziun romontschs, mobein era sil sectur dils mieds d’instrucziun en general.

Miu Moodle – in dils fretgs da ACCESS
Gia a caschun dalla Conferenza romontscha a Mustér – nua che Thoma ei staus in dils referents che han presentau ACCESS – ha il pedagog e programmader giu fatg attents ch‘el seigi vid sviluppar schizun aunc ina ulteriura nova pusseivladad per las scolastas ed scolasts da luvrar cun Moodle. Gartegi quei, arrivien ins cun in sulet clic naven da www.access.ac vi sin „Miu Moodle“, aschia vegni la nova purschida a senumnar. El decuors da quellas pèr jamnas ei l’annunzia gia daventada realitad. Avon duas jamnas ha la Pro Idioms astgau informar las scolastas ed ils scolasts davart il novum che munta ina purschida supplementara. Far diever da „Miu Moodle“ sa tut tgi che seregistrescha sin www.access.ac, independent schebein ei vegn fatg diever dil mied d’instrucziun ACCESS ni buc. Cheu sa mintga scolasta e mintga scolast endrizzar e crear siu agen „liug d‘emprender online“ nua ch’ei sa p.ex. vegnir mess a disposiziun informaziuns davart temas tractai en scola, videos, audios, apps, links, e surtut era exercezis che san vegnir observai ed evaluai automaticamein, e quei per tut ils roms da scola. Normalmein drova ei fetg bunas enconuschientschas dall'informatica per ina tala installaziun e silsuenter per l'administraziun d’ina classa. Cun „Miu Moodle“ vegnan tut quels obsta-chels pretensius eliminai.

Schenghetg prezius
Entochen igl uost 2013 porscha la Pro Idioms licenzas gratuitas per „Miu Moodle“. Silsuenter cuosta ina licenza 50 raps per scolara/scolar e per meins. Quella contribuziun sustegn la finanziaziun dil project ACCESS. Il proxim onn da scola san scolastas e scolasts interessai frequentar cuors da Moodle organisai da Marc Thoma ed Adrian Cathomas.
Cun Miu Moodle ha la Pro Idioms fatg in prezius schenghetg da Nadal e biemaun all’entira scola romontscha e bilingua, mo era allas autras scolas dil cantun Grischun e schizun d’autro – in regal che possibilitescha pia innovaziun per tutta instrucziun.
Pro Idioms Surselva