05:34
Sogn Galazion e sia spusa Epistemia, marters. pdf: cheu l’entira historia Ils 7 da november: Sogn Galazion e sia spusa Epistemia, marters El marcau da Emesa sper il cuolm da Libanon viveva in reh signur …Daplü
Sogn Galazion e sia spusa Epistemia, marters.

pdf: cheu l’entira historia
Ils 7 da november: Sogn Galazion e sia spusa Epistemia, marters
El marcau da Emesa sper il cuolm da Libanon viveva in reh signur pagaun cun sia dunna. Els fuvan trests da buca ver affons e fagevan gia onns ora unfrendas a lur dieus per urbir ora figlialonza. Sur da quei marcau regeva Secundus, in ferm inimitg dils cristians. Quel veva en num digl imperatur Alexander publicau crudeivels decrets encunter ils cristians. Da quei temps banduna in sogn eremit spiritual siu eremitadi e vegn vestgius da betler el marcau per confortar e consolar ils perschuniers. Rugond per almosna, splunta el era tier quella dunna che fuva tut tresta. Il sogn damonda suenter la raschun da sia melanconia. Ussa che la dunna ha levgiau empau siu cor, fa il sogn spiritual la caussa clara e lai saver, sch’ella banduni ils fauls dieus e renconuschi il tutpussent Diu dils cristians per il sulet ver Diu, sche retscheivi ella segiramein la grazia desiderada. Ord spir plascher da saver purtar ora affons, damonda la dunna per empau temps da patertgar e serecumandar a quei ver Diu.
La notg sisu cumpara Cristus vid la crusch ad ella e di: Jeu sun Jesus Cristus, il Fegl da Diu che ha entras la crusch spindrau il mund. Perquei che ti has clamau en agid mei, ditgel jeu a ti: sche ti selaias battegiar, vegns ti ad esser liberada dalla nunfritgeivladad. Sin quei selai la dunna battegiar, daventa cuort sisu purtonta e cun raquintar a siu mariu tut il schabegiau, retscheiva era el digl eremit il sogn Batten.
Suenter ils nov meins nescha il desiderau affon ed els numnan il mattatsch Galazion. Quei affon educheschan els en tema da Diu e meinan el sin la via dallas vertids. Cun 24 onns piarda Galazion la mumma e per obedir al bab marida el la giuvna pagauna Epistemia, denton buca sco consorta, mobein sco sora. Galazion instruescha la giuvna els misteris dalla sontga cardientscha e battegia lu sia consorta cun ses agens mauns, pertgei egl entir marcau deva ei negin spiritual catolic, tuts eran herets. Per engraziament a Diu semetta Epistemia duront otg dis en cuntinuada oraziun e retscheiva alla fin en siemi ina visiun, sco sch’ella fuss en in custeivel palaz. Dad ina vart vesa ella umens e dunnas vestgi tut en ner e pleins legria; da l’autra vart giuvens e giuvnas vestgi aunc pli custeivel e che levan medemamein far ad ella cumpignia. Galazion declara la muntada aschia: las persunas vestgidas en ner significheschan ils maridai che han cun lur bunas ovras gudignau il parvis; ils giuvens e las giuvnas en alv muntan quels che han manteniu lur purschaladi e meritau dil parvis pli gronda gloria. Sin quei sedecidan omisdus da viver ussa sco frar e sora. Lur rauba dattan els als paupers e serendan viers il cuolm Sina, mintgin dapersei en ina claustra. Treis onns en oraziun e penetienzia fuvan vargai che Secundus tarmetta ora ses sbiers per far catscha sils cristians en claustras ed eremitadis. Sinquei fuin ils biars el zuppau. Sogn Galazion resta persuls anavos per daventar in marter da Cristus. Ils sbiers meinan el naven, ligiaus vid sugas e cadeinas. Udend Epistemia che siu spus seigi mess a ferm, roga ella la superiura d’astgar far cumpignia al car mariu. Vid las medemas cadeinas meinan ils sbiers ils dus sogns avon il derschader. Damai ch’els restan statteivels confessurs da Cristus e sbettan taframein ils fauls idols, tractescha il tiran els sin modas crudeivlas e per biars nuncapeivlas. Mo miracla gronda! Era senza lieunga, mauns e peis perdegavan ils sogns marters aunc pli stagn la gloria e la forza da Jesus Cristus. Per buca esser confundius lai il tiran sin quei scavazzar domisdus. Quellas beadas olmas han gudignau la dubla cruna dil marteri e dil purschaladi e quei entuorn igl onn 250.
Abramo
Fetg interessant: «Egl entir marcau deva ei negin spiritual catolic, tuts eran heretics». Quei ei oz la regla en Svizra.