05:20
Sogn Placi, marter e sogn Sigisbert, avat e confessur. pdf: cheu l’entira historia Ils 11 da fenadur: Sogn Placi, marter e sogn Sigisbert, avat e confessur Oz vegn fatg a Mustér gronda festivitad e …Daplü
Sogn Placi, marter e sogn Sigisbert, avat e confessur.

pdf: cheu l’entira historia
Ils 11 da fenadur: Sogn Placi, marter e sogn Sigisbert, avat e confessur

Oz vegn fatg a Mustér gronda festivitad e quei buca senza raschun. Pertgei entras sogn Sigisbert e sogn Placi ei la sontga cardientscha vegnida leu perdegada. Entuorn igl onn 545 ei sogn Sigisbert naschius ad Irlanda. El ha lu studegiau e quei cun sogn Columban. Lu ein omisdus daventai paders en la claustra da Benchor, nua ch’els fuvan 600 muntgs. Suenter enzacons onns ei sogn Columban cun lubientscha e benedicziun da siu avat serendius en autras tiaras per purtar il sogn evangeli als pagauns. Sogn Sigisbert, sogn Gagl ed aunc 10 auters paders han medemamein astgau far cumpignia ad el. Els ein i da Irlanda tras l’Engheltiara vi en Frontscha tier il curteseivel retg Sigisbertus. Per esser meins disturbai va sogn Columban cun sia cumpignia en in eremitadi. Els baghegian leu ina claustra che crescha sin 200 claustrals. Entuorn igl onn 611 ein sogn Columban e sogn Sigisbert serendi encunter la Svizra ch’era aunc pagauna. Finalmein arivai ad Ursera han els avon che ir vinavon baghegiau ina baselgia che porta aunc oz il num da sogn Columban. Suletamein sogn Sigisbert ei lu restaus ad Ursera sco eremit. Pli tard va el sul cuolm Crispalt e seferma en in plaun che pareva in desiert. Quei nua che la claustra da Mustér stat oz e da quel deriva il num Desertina. Cheu ha sogn Sigisbert bein prest construiu ina caplutta en honur da Nossadunna ed in per cellas. El perdegava il sogn evangeli e la ductrina da Cristus. Entras las miraclas che schabegiavan ha el convertiu e battegiau quei pievel pagaun. Denter ils emprems discipels da sogn Sigisbert steva sogn Placi, in reh e pussent signur dalla vallada che tedlava bugen ses priedis. Sogn Sigisbert ha lu battegiau el e profetisau ch’el vegni cul temps a daventar in marter da Cristus. Sogn Placi che fuva buca cuntents da mo esser cristians, banduna tuttas rihezias da quest mund. Siu fatg ha el mess els mauns da sogn Sigisbert. Cun quei ha sogn Sigisbert baghegiau ina claustra e consecrau quella a Diu ed a Nossadunna sut la regla da sogn Benedetg. Entras la ductrina da sogn Sigisbert e sogn Placi carschevan ils fretgs spirituals di per di. Da quei temps, entuorn igl onn 630 vegneva la Rezia regida dil ruh e crudeivel cont Victor da Cuera. Quei sclav digl uffiern ch‘era plein scuidonza, arriva da Cuera a Desertina per impedir il bien progress dalla claustra. Cu tutta groppadad pretenda el ils beins e la facultad che sogn Placi veva surdau a sogn Sigisbert. Vesend la malgesta pretensiun e las smanatschas ha il sogn avat sco emprem recumandau tut a Nossadunna. Sogn Placi va cun curascha tier quei signur da Cuera per turzegiar e dir ch’el duessi schar quei scandalus sedepurtar. Mo lez tut vilaus e grittentaus, smanatscha cun la mort e catscha il sogn ord casa. Per far in plascher a lur signur ein zaconts sbiers dai suenter ad el e gest leu nua che la baselgia da sogn Placi stat oz, han els tagliau giu il tgau al sogn pader. Sogn Placi pren siu tgau e porta quel enta maun en in lenziel a sogn Sigisbert. Vesend ils sbiers la miracla, han ei pegliau gronda tema e fugi el casti. Cont Victor ei lu semess sin siu cavagl e culs auters vuliu passar la punt dil Rein e quei in di d’aua gronda. Mo la divina giustia ha serrau il pass a quei miserabel signur. La punt ei dada ensemen ed il cont cun siu cavagl, sco era ina part da ses survients ein curdai el flum e negai. Treis dis pli tard, ils 11 da fenadur digl onn 620 ei il tgierp da sogn Placi vegnius satraus da maun dretg dalla baselgia da Nossadunna. Aschi ditg che sogn Sigisbert ei vivius, ha el fatg di e notg oraziun sper la fossa da sogn Placi cun serecumandar a Diu. Igl onn 636 ha Diu era clamau quei survient ord questa veta vi en la gloria celestiala. Sco quei ch’el sez veva giavischau ei siu tgierp vegnius mess en la medema fossa cun sogn Placi. Suenter lur mort ein biaras miraclas daventadas e tut tgi che recureva tier els retscheveva grondas grazias e favurs spiritualas.
ursula
Danke liebe Tina ,das muss ich meinem Plazi auch zeigen.
👏 👏 👏 👏 👏 👏 👏 👏 👏 👏
Abramo
"Sclav digl uffiern plein squidonza" - cheu han ins aunc la curascha alla verdad.
👍Daplü
"Sclav digl uffiern plein squidonza" - cheu han ins aunc la curascha alla verdad.

👍