«Da Tschlin a Tschamut» nova DVD cun fotografias veglias da vischnancas grischunas
rumantschas dal chantun Grischun.
Mintga venderdi durant il 2010 ha La Quotidiana publitgà ina pagina cun fotografias veglias or da la fototeca da l’Institut dal DRG. La raschun per quell’acziun speziala era stada il giubileum da 125
onns da la Societad Retorumantscha (SRR).
Las reacziuns ordvart positivas sin questa pagina da vart da lecturas e da lecturs ans ha motivà da surlavurar ed amplifitgar il material e d’edir ina DVD cun tut las fotografias publitgadas en La Quotidiana durant il 2010 ed ulteriuras fotografias da la fototeca dal IDRG. La finala cuntegna quella tut las vischnancas actualmain rumantschas e las anteriuras rumantschas dal chantun Grischun, pressapauc 500 fotografias da bajetgs, chasas e vischnancas.
Il viadi cumenza a Tschlin, traversa l’entir intschess rumantsch cun sias subregiuns dialectalas e finescha finalmain sisum la Val Tujetsch a Tschamut.
La DVD è cumpatibla cun Windows e Mac (pretenda in giradiscs per DVDs), ella sa dentant era vegnir guardada sin la televisiun. Ella custa 30.– francs ed ins la po retrair da l’Institut dal DRG, Ringstrasse 34, 7000 Cuira (tel. 081 / 284 66 42 u info@drg.ch).
Visitai gist nossa pagina d’internet www.drg.ch u ans contactai, da nov era sin facebook: www.facebook.com/Dicziunari.
