Sogn Otmar, avat e confessur. pdf: cheu l’entira historia Ils 16 da november: Sogn Otmar, avat e confessur Sogn Otmar deriva da nobla parentella ord la tiara dils Schuobs. Gia en ses giuvens onns vegn …Daplü
Sogn Otmar, avat e confessur.
pdf: cheu l’entira historia
Ils 16 da november: Sogn Otmar, avat e confessur
Sogn Otmar deriva da nobla parentella ord la tiara dils Schuobs. Gia en ses giuvens onns vegn el a Cuera tier cont Victor. Leu studegia e seperfecziunescha el en las vertids e daventa augsegner. Uestg Vigeli tschenta il sogn um per canoni dalla baselgia catedrala da sogn Flurin. Sogn Otmar tarlischa cheu schi fetg en vertid, sontgadad e sabientscha ch’il cont dalla Turgovia giavischa el per avat dalla claustra da sogn Gagl. Quei ei daventau entuorn ils onns 720, pertgei da gliez temps fuva quella claustra ida en gronda decadenza ton egl esser spiritual sco el temporal. Cun grondas stentas ha il sogn avat reparau quella en tuts graus, carschentau il diember dils paders e mess puspei il survetsch divin e la disiplina en bien stan. El sez viveva fetg mudest e deva als paupers ton sco ei fageva basegns e vestgeva savens ils nius sin las vias cun da sia atgna vestgadira. Damaneivel dalla claustra eregia sogn Otmar aunc in spital, principalmein per leprus, als quals schizun el sez deva agid ed uorden. Ussa che tut ei en bien stan e flurescha, leventa il demuni si ord spira scuidonza tempiasta e persecuziun encunter il sogn e la claustra. Ils dus castellans dalla Turgovia e dil Schuobalan emprovan cun tutta forza trer a sesez raubas e possessiuns da baselgias e claustras, cunzun da quella da sogn Gagl. Sogn Otmar, buca pudend far resistenza a tala malgestadad, sevolva ussa per agid tier Pipin, retg dalla Frontscha. Lez metta il sogn e la claustra sut sia protecziun e fa turnar tut quei ch’ils raffaders vevan priu. Plein ravgia spetgan quels dus di e notg sin la caschun da far vendetga. Ils dus scrocs vegnan da surplidar in pader da inculpar il sogn avat da ver comess in falliment cun ina femna e lu dar faulsa perdetga. Il sogn vegn menaus avon igl uestg da Constanza e ses cussegliers. Cheu stat el senza sedefender ed en tutta humilitonza di el: Jeu confessel che vaiel zacu fatg biars puccaus, mo davart quei vezi, prendel jeu Diu sco perdetga, il qual vesa era en miu zuppau. Sin quei vegn sogn Otmar privaus da sia abbazia e serraus en perschun a Bodmen senza vivonda. Mo da notg deva in bien pader discusamein agid al sogn perschunier e quei entochen ch’in niebel signur ha saviu liberar e menar el sin ina insla spel Rein. Suenter dus onns da cumpleina sontgadad, ei sogn Otmar vegnius malsauns e lu morts beadamein ils 16 da november entuorn igl onn 760. Suenter 10 onns vegn il sogn tgierp aunc bials ed entirs translocaus a sogn Gagl en sia claustra. Duront quella translocaziun han pliras miraclas dau perdetga dalla sontgadad da quei glorius sogn avat. Ils endisch paders che accumpignavan las reliquias da sogn Otmar sin la nav, vevan era priu cun els ina pintga buot vin. Duront ch’els passavan il lac Bodan, ei in furius stemprau sesalzaus e schau crer che tuts mondien a frusta. Mo senza dubi ha sogn Otmar protegiu els dallas undas e dil suffel. Ils navadurs, staunchels ch’els eran, levan prender in refrestg e beiber dil vin. La buottetta fuva denton prest vita. Mo pli ch’els derschevan ora e pli ch’ella s’empleneva, aschia che tuts han survegniu detgavunda. Per memoria da quella miracla vegn sogn Otmar presentaus cun in butritg sin siu maun. Aunc dad autras miraculusas caussas relata pader Henric Murer en sia Helvetia sancta.
pdf: cheu l’entira historia
Ils 16 da november: Sogn Otmar, avat e confessur
Sogn Otmar deriva da nobla parentella ord la tiara dils Schuobs. Gia en ses giuvens onns vegn el a Cuera tier cont Victor. Leu studegia e seperfecziunescha el en las vertids e daventa augsegner. Uestg Vigeli tschenta il sogn um per canoni dalla baselgia catedrala da sogn Flurin. Sogn Otmar tarlischa cheu schi fetg en vertid, sontgadad e sabientscha ch’il cont dalla Turgovia giavischa el per avat dalla claustra da sogn Gagl. Quei ei daventau entuorn ils onns 720, pertgei da gliez temps fuva quella claustra ida en gronda decadenza ton egl esser spiritual sco el temporal. Cun grondas stentas ha il sogn avat reparau quella en tuts graus, carschentau il diember dils paders e mess puspei il survetsch divin e la disiplina en bien stan. El sez viveva fetg mudest e deva als paupers ton sco ei fageva basegns e vestgeva savens ils nius sin las vias cun da sia atgna vestgadira. Damaneivel dalla claustra eregia sogn Otmar aunc in spital, principalmein per leprus, als quals schizun el sez deva agid ed uorden. Ussa che tut ei en bien stan e flurescha, leventa il demuni si ord spira scuidonza tempiasta e persecuziun encunter il sogn e la claustra. Ils dus castellans dalla Turgovia e dil Schuobalan emprovan cun tutta forza trer a sesez raubas e possessiuns da baselgias e claustras, cunzun da quella da sogn Gagl. Sogn Otmar, buca pudend far resistenza a tala malgestadad, sevolva ussa per agid tier Pipin, retg dalla Frontscha. Lez metta il sogn e la claustra sut sia protecziun e fa turnar tut quei ch’ils raffaders vevan priu. Plein ravgia spetgan quels dus di e notg sin la caschun da far vendetga. Ils dus scrocs vegnan da surplidar in pader da inculpar il sogn avat da ver comess in falliment cun ina femna e lu dar faulsa perdetga. Il sogn vegn menaus avon igl uestg da Constanza e ses cussegliers. Cheu stat el senza sedefender ed en tutta humilitonza di el: Jeu confessel che vaiel zacu fatg biars puccaus, mo davart quei vezi, prendel jeu Diu sco perdetga, il qual vesa era en miu zuppau. Sin quei vegn sogn Otmar privaus da sia abbazia e serraus en perschun a Bodmen senza vivonda. Mo da notg deva in bien pader discusamein agid al sogn perschunier e quei entochen ch’in niebel signur ha saviu liberar e menar el sin ina insla spel Rein. Suenter dus onns da cumpleina sontgadad, ei sogn Otmar vegnius malsauns e lu morts beadamein ils 16 da november entuorn igl onn 760. Suenter 10 onns vegn il sogn tgierp aunc bials ed entirs translocaus a sogn Gagl en sia claustra. Duront quella translocaziun han pliras miraclas dau perdetga dalla sontgadad da quei glorius sogn avat. Ils endisch paders che accumpignavan las reliquias da sogn Otmar sin la nav, vevan era priu cun els ina pintga buot vin. Duront ch’els passavan il lac Bodan, ei in furius stemprau sesalzaus e schau crer che tuts mondien a frusta. Mo senza dubi ha sogn Otmar protegiu els dallas undas e dil suffel. Ils navadurs, staunchels ch’els eran, levan prender in refrestg e beiber dil vin. La buottetta fuva denton prest vita. Mo pli ch’els derschevan ora e pli ch’ella s’empleneva, aschia che tuts han survegniu detgavunda. Per memoria da quella miracla vegn sogn Otmar presentaus cun in butritg sin siu maun. Aunc dad autras miraculusas caussas relata pader Henric Murer en sia Helvetia sancta.