Sogn Bistgaun, marter.

pdf: cheu l’entira historia
Ils 20 da schaner: Sogn Bistgaun, marter

Sogn Bistgaun fuva in cavalier da Cristus che fageva survetsch sut ils imperaturs Dioclezian e Maximian, dus sgarscheivels persequitaders dils cristians. Sco fideivel e valerus cavalier fuva el fetg preziaus digl imperatur Dioclezian ed aschia daventaus capitani dall’emprema guardia. Denton el zuppau fuva el in bien cartent ed el veseva che biars cristians, muort la crudeivla tirannia stevan en prighel da dar giud la cardientscha.
Cheu anfla el per meglier da buca pli ditg quescher e palesar ch’el segi in cristian, per aschia saver porscher meglier agid e confiert als tementai e zacchegiai. Cun far quei sogn survetsch ha el puspei gudignau zun biaras olmas, sco per exempel era ils dus frars Marcus e Marcellianus che havevan confessau Cristus e fuvan uss en perschun e sentenziai alla mort. Quels perschuniers ha Sebastian gidau e confortau da star statteivels el propiest da murir per amur da Jesus Cristus. Duront che sogn Bistgaun deva curascha als dus frars perschuniers, ha il tschiel confirmau ses plaids cun veras miraclas. Ina clarezia vegn sur da quei liug, nua che sogn Bistgaun plidava. Amiez la glisch cumpara Cristus cun siat aunghels e va tier il sogn e di: „Bistgaun, ti vegns adina ad esser en mia cumpignia.“ Quei ei schabegiau en casa da Nicostratus, in ufficial dil derschader. Zoe, la dunna da Nicostratus che fuva gia sis onns metta, ha viu quella clarezia ed ei semessa enschanuglias avon sogn Bistgaun cun dar enzennas ch’ella vegli esser cristiana. Sin quei di sogn Bistgaun: Sche jeu sun in survient da Cristus e sche tut quei che jeu hai plidau ei ver, lu vegli Diu medegar tei! El fa l’enzenna dalla sontga crusch sin la bucca da Zoe ed ella ha immediat plidau e ludau il ver Diu. Sin quei ei Nicostratus e l’entira famiglia seconverti e lu cun aunc biars auters vegni battegiai. In temps pli tard ein lu tuts vegni marterisai, damai che la persecuziun carscheva cuntinuadamein. Negin saveva ussa vender ni cumprar enzatgei, senza haver igl emprem adurau in dils fauls dieus. Perquei bandunavan ils biars cristians il marcau e sezuppavan sils hofs.

Paucs eran restai anavos. Denter quels sesanflava sogn Bistgaun, al qual papa Cajus veva dau il tetel da defensur dalla cardientscha da Cristus. Mo ussa ha Dioclezian survegniu novas che sogn Bistgaun, siu emprem capitani, seigi in cristian e cumbatti cun tutta forza lur dieus. Dioclezian dat en sia gretta la sentenzia che Bistgaun duei vegnir ligiaus vid ina plonta e sigettaus cun paliats. En pign mument fuva siu tgierp perforaus da paliats. La notg ei Irena, ina vieua, vegnida per satrar il tgierp. Mo ella anfla il sogn aunc en veta e lai discusamein purtar il grev blessau en sia casa e dat leu agid, aschia ch’el fuva en paucs dis staus medegaus.

Sogn Bistgaun saveva ch’igl imperatur vegni in di a passar ina certa gassa dil marcau. Cheu va il sogn encunter ad el e cloma cun ferma vusch: O prenci, ils sacerdots dils vos tempels dattan …