Sontga Genoveva purschala.

pdf: cheu l’entira historia

Ils 3 da schaner festivescha la Baselgia sontga Genoveva purschala

Sontga Genoveva - patruna dil marcau da Paris, - ei naschida igl onn 419 a Nanterre, in liug damaneivel da Paris. Ses geniturs eran sempla glieud - mo da gronda pietad e tema da Diu.

Gia baul en ses giuvens onns fuva Genoveva favorisada da Diu cun spezialas grazias e duns.

Sogn Germann ch‘era da gliez tems uestg da Auxerre mava tral marcau a Nanterre ed entaupa ils genitus cun lur feglia Genoveva. Quella giuvnetta ei bein spert curdada si agl uestg ed el ha profetisau a ses geniturs.
„Ils aunghels han selegrau dalla naschientscha da Vossa feglia, pertgei ella vegn cul temps a survir sco spieghel als carstgauns per ina veta sontga. Educhei ella per dar a Diu“.

L’emprema miracla ch’ei daventada entras il merets da Genoveva - ch‘era ca. 9 onns - ei stada quella che sia mumma ch’era vegnida tschocca - ha puspei survegniu suenter dus onns la vesida. Sontga Genoveva viveva ina veta cun bia gigina. Ella era in ferma che temeva neginas cruschs.

Da quei temps ei Attila, retg dils Huns, daus en Frontscha cun gronda armada. Sontga Genoveva cusseglia il pievel d‘urar e sevolver cun schuber cor tier Diu, sche vegni Diu segir a proteger els encunter Attila. Cun dar in tal cussegl ei la sontga purschala vegnida en prighel da veta da quels che levan bandunar il marcau. Lur dunnas han urau cun sontga Genoveva ensemen e Diu ha defendiu il pievel ed il marcau encunter Attila.

Pli tard ei sontga Genoveva entrada a Paris en claustra e vegnida superiura. Ella viveva ina veta d‘oraziun ed enconuscheva ils cors dils carstgauns che cartevan chei segien buns, mo eran en sesez schliats.

Ils 3 da schaner 499, ha ella terminau cun 80 onns sia veta.

Ins pren refugi tier sontga Genoveva en temps d’uiaras, murias, fomazs, stempraus e malauras.