Fontaunas da dretg romontschas
Il november 2007 ha gì lieu la preschentaziun da la publicaziun «Fontaunas da dretg romontschas», il
tom 17 da la retscha Romanica Rætica da la Societad Retorumantscha. Quatter onns pli tard dispona
ella d’in register online: www.annalas.ch/fontaunas.
«Fontaunas da dretg romontschas»
Suenter che Andrea Schorta aveva rimnà e sistematisà fin il 1985 ils texts giuridics dal territori ladin, restavi
da far anc il medem per l’ulteriur territori rumantsch.
Sin inziativa da l’istoricher Martin Bundi è vegnida realisada l’ediziun voluminusa e cumplessiva «Fontaunas
da dretg romontschas», ina vasta collecziun da las funtaunas da dretg or da l’anteriur intschess da la Lia da
la Chadé e da la Lia Grischa. I sa tracta qua per gronda part d’ina reproducziun facsimile da numerus
documents giuridics dal 17avel enfin l’entschatta dal 19avel tschientaner, publitgads en la «Crestomazia» da
Caspar Decurtins ed en las «Annalas» da la Societad Retorumantscha, sco era da documents inedits u er
nunenconuschents fin oz.
Register da las «Fontaunas da dretg romontschas» online
Co chatt’ins dentant tut quests documents senza stuair perder memia bler temp? Ils editurs avevan decidì a
sias uras da crear in register sco glista separada per na betg surchargiar il tom detg voluminus. Las «Fontaunas
da dretg romontschas» na disponan betg d’in tal e cunquai ch’ils documents n’existan betg en furma
digitala, han ins stuì indexar a maun quest material, quai ch’è era vegnì fatg per pudair crear in index tenor in
sistem da categorias e chavazzins. A basa da quel ha Duri Denoth sviluppà in program per metter il Register
da las «Fontaunas da dretg romontschas» en la rait.
Il Register da las «Fontaunas da dretg romontschas» online www.annalas.ch/fontaunas cumplettescha
l’ovra da Martin Bundi. Grazia a quel è il material publitgà uss pli accessibel a tut las persunas che vulan
lavurar cun el.
Las «Fontaunas da dretg romontschas» èn da retrair tar l’Institut dal DRG, Ringstrasse 34, 7000 Cuira
(tel. 081 / 284 66 42 u info@drg.ch).
Visitai gist nossa pagina d’internet www.drg.ch u ans contactai, da nov era sin facebook:
www.facebook.com/Dicziunari.
Institut dal DRG Tel.: +41 (0)81 284 66 42 Mail: info@drg.ch
Ringstrasse 34, CH–7000 Cuira Fax: +41 (0)81 284 02 04
Internet: www.drg.ch