50 % dals giuvens dil Grischun s'interesseschan bu per il sport d'unviern. Els secuntentan sco ei para da star avon il computer enstagl dad ir cun skis. A gloria.tv sa quei esser endretg, beinsavend ch'ei dat aunc bia autras bunas paginas ed aunc dapli schliatas.

Igl uestg auxiliar da Cuera Mariano Eleganti celebreschi ussa creismas senza messa perquei che la glieut (da "fideivels" san ins buca discuorer) presenta hagi buca idea tgei che la messa seigi. Ins sa capir Eleganti che endira dils effects dalla "catechesa" suenter il Concil che vala buca ils fiars dil giavel e ha paganisau entiras generaziuns.
Denton crei Eleganti che la glieut sappi dapli dalla Creisma che dalla messa?

Il firau da sogn Giusep vegn pli e pli dismess dallas vischnauncas politicas. Il Decanat surselva vul perquei ir (e svanir) cun il trend e stuschar sogn Giusep sin la dumengia.
Cunquei che fetg paucs van en baselgia la dumengia savess ins lu era stuschar la dumengia sin Nadal e fusionar Nadal cun Pastgas.
E la fin finala savess ins fusionar il decanat Surselva cun l'uniun da cura e traffic perquei nossas baselgias ein ina biala attracziun per il foto-turism.

Dils 15 entochen ils 17 d’uost ein ils missiunaris catolics dalla Svizra che lavuran en tiaras jastras seradunai en la venerabla claustra dallas soras da Glion duront lur congedi en patria.
Tgei han els pomai fatg la sera dils 15 d’uost, solemnitad dall’Assumpziun da Maria a tschiel? Allas 18,15 han celebrau … il Sabbat.
Lein silmeins sperar ch’ils participonts seigen buca vegni constrengi prealablamein da sesuttaponer alla circumcisiun.

Sur Silvio Camenisch ha titulau il cusseglier naziunal Martin Candinas ils 3 da fenadur ella Cazzetta Rontscha sco augsegner («Don Candinas») Daco buc «Sur Candinas»?
Quei ha Sur Silvio fatg sco beffa. Esser in augsegner ei oz numnadamein ina zanur. Quei san perfin ils augsegners che sezuppan perquei davos cravattas, monduras, tschontschas vitas e venters pleins.
Tgei ha motivau Sur Silvio – che porta perfin ina tonsura – a tal meini? Quei ei grev da dir. La buglia ch’el ha scret ella Gasetta Rontscha sco ‘Plaid per la dumengia’ ei liunga e fetg tschuora.
Ei va per in text dalla campagna dubiusa «Stop-aids». Quei text ei staus translataus per pachistani, tamil e albanes denton buca per romontsch. Dapli san ins buca capir. Candinas ha pari reclamau che quella translaziun ei buca vegnida fatga.
Tonscha quei per haver meritau il tetel «Don»?
Nun che Sur Silvio havess manegiau «’Don’ per un mafioso e non per un sacerdote»? Ella Sicilia numnan ins buca mo ils augsegners «Don» (per exempel: …More

La pleiv da Tujetsch ha rennovau la caplutta da Zarcuns (denter Sedrun e Rueras) per 400.000 francs e ha ussa in deivet da 100.000 francs. Perquei ha il cussegl dalla pleiv tarmess ina brev per donaziuns allas autras pleivs. A tala brev han ei aschuntau ina informaziun sur dalla caplutta da Zarcuns. Quei prospect menziunescha igl entir cussegl dalla pleiv ensemen cun lur augsegner: “sur Reto Nay, plevon”. Quei augsegner che roga pari aunc adina per donaziuns per la caplutta da Zarcuns, han els denton gia catschau il mars 2013 (cun ni senza igl agid da Nossadunna) ord la val Tujetsch.

Igl Osservatore Romano ha empleniu ier l’entira quarta pagina cun dus artechels sulla claustra da Mustér ord caschun digl anniversari da 1400 onns dalla venerabla claustra. Gl’emprem artechel cun il tetel «Una barca fra i monti svizzeri» ei da cardinal Kurt Koch, ina contribuziun aschi lunsch interessanta che dat perdetga che Koch sco anteriur uestg da Basilea sa buca bia da Mustér.
Gl’auter artechel pli cuort da Simona Verrazzo cun il tetel «Radicata nei Grigioni» (Ragischada el Grischun) discuora pli concretamein dalla historia dalla claustra. Ella numna ils claustrals «ina communitad amatissima en questa val che dat perdetga dalla vischinonza alla populaziun».
Donn che la «populaziun» sehona ton pauc da tala vischinonza. Ni forsa manegiava igl artechel «vischinonza» el senn dil plaid «vischi»?
Forsa che zatgi savess translatar quels artechels e pubblicar els ella Gasetta Rontscha.
-------
Millequattrocento anni fa veniva fondata l’abbazia di Disentis/Mustér
Una barca fra i monti …More

Dacuort ha il schinumnau Uffeci federal per sanadad lantschau ina campagna che ha custau 2 milliuns (!) francs daners da taglia cul pretext da prevegnir allas malsognas sexualas.
Nus lein buca tematisar cheu las purtgerias da quella campagna che vegn derasada en tuts ils lungatgs pusseivels, naven digl albanès entochen il lungatg tamil, denton buca - Dieus seigi ludaus - per romontsch.

Quei ch'il miedi e poet Giachen Mihel Nay (1860-1920) - e sez commember dil cussegl grond - veva maniau dils deputai grischuns vala era suenter las elecziuns dad ier.
Anzi, ins sedamonda sch'ei dat ozildi insumma aunc tgaus e buca mo tg...

Ferton che biars van bia e bugen sin viadi cul tren, dat ei adina dapli glieud senza bigliet che drova il tren per far il davos viadi enten seschar manizzar entras las rodaias. Quei ei trest ed aunc pli disgustus per tuts. Il pli fetg per il manischunz dalla locomotiva e per quels che ston schubergiar ella suenter.

La "sculptura" Ogna - ina construcziun da betun armau digl "artist" indigen Matias Spescha - ei vegnida decorada cun maletgs d'auters "artists".
Igl ei vegniu enconuschent (salva dementi) ch'ins hagi fatg tut da bugen per far reclama per in ovra da varga in milliun, curdada en emblidonza. Sin mintga cass san ins mo esser engrazievels als "picturs-artists", era sch'ei vessan saviu sedar empau dapli breigia. Mo gliez valess era per sgr Spescha.

Il president dalla vischnaunca da Tujetsch, Pancrazi Berther, ha survegniu peta pagada. Suenter ch'el - ch'ins vesa en baselgia silpli per sepulturas - ha stigau bravamein encunter igl augsegner e gidau da scatschar el ord la val avon biabein in onn, sto ussa era el bandunar siu post.
El ha mai valiu per ina gronda glisch malgrad ch'el havess buca giu bia concurrenza en ina vischnaunca nua che quels cun talent fuian dalla val giadora.

Suenter che nus vevan rapportau ch'il directur dal radio e dalla televisiun svizra vegli in quota da 30 % femnas el cader, han ins "elegiu" in'engiadinesa sco directura dal radio e dalla televisiun romontscha.
Aschia vegnan il president, la directura e il cau-redactur dalla Giadina. Quei ha dr Giusep Capaul fatg paleis sco sulet ella gasetta e scret cun tutta raschun che quei fuss stau nunpusseivel aunc avon paucs onns.