Oz festivescha Rev. Sur Ignazi Pally siu pompus giubileum d'aur sco augsegner. Sur Pally ei oriunds da Corzoneso ella val Blegn nua ch'el ei naschius d'in bab medelin e d'ina muma bleniesa. Gia sco affon legeva el cun gronda premura la Gasetta Romontscha che exista deplorablamein buca pli.
El ei vegnius ordinaus ils 4 da zercladur 1966 da uestg Angelo Giuseppe Jelmini (+1968). Sur Ignazi pastorescha cun grond success ellas pleivs da Ruschein, Ladir, Sevgein e Pigniu.
El ei in scribent talentau, linguist e schurnalist cun in grond interess per las gasettas. Nus sperein ch'el contonschi la vegliadetgna da Moses e possi aunc pastorar biars decennis ella biala Surselva.
Ad multos annos per ils proxims tschunconta onns da sacerdoci e cordiala gratulaziun.
Semper in summum, numquam retrorsum.